Kailangan ng salapi, ito ang kalakaran

kailangan ng pera, ito ang sabi ni misis
dahil sa kahirapan, ayaw na niyang magtiis
dapat daw akong magtrabaho't mabili ang nais
sumweldo't nang may pambayad sa bayarin at buwis

kailangan naming magbayad ng kuryente't tubig
bayad sa ospital pag nagkasakit o nabikig
pambili ng ilalaman sa aming mga bibig
pulos sa pera na lang umiikot ang daigdig

kailangan ng salapi, ito ang kalakaran
upang mabuhay ka'y dapat ka ring maging bayaran
lakas-paggawa'y ibebenta hanggang masahuran
ilang taon bang ganito ang iyong katauhan

kailangan ng kwarta, dapat lagi kang may sweldo
kung di man limpak na tubo pag ika'y nagnegosyo
ganyan ang palakad sa lipunang kapitalismo
binibili na rin ng pera pati pagkatao

- gregbituinjr.